Meksikada ommaviy mushtlashuvdan so‘ng stadionda bir muxlis otib o‘ldirildi.
Associated Press nashri xabariga ko‘ra, hodisa 13 iyul kuni Meksika Aperturasining 2-turidan o‘rin olgan "Tixuana" – "Gvadalaxara" (4:2) uchrashuvi vaqtida yuz bergan. Uchrashuv yakunida ikki jamoa muxlislari o‘rtasida mushtlashuv kelib chiqdi. Keyinroq ijtimoiy tarmoqlarda mushtlashuv ishtirokchilaridan birining "Tixuana" futbolkasini kiyib, stadion to‘xtash joyida yotgani va qon ketayotgani aks etgan suratlari e’lon qilindi.
24 yoshli yigit qo‘li, orqasi va boshidan o‘q jarohatlari olgan – keyinchalik u kasalxonada vafot etgan. Prokuratura ma’lumotlariga ko‘ra, hujum qilgan shaxs jinoyat joyidan qochib ketgan.
Voqea bilan bog‘liq bayonotda Liga MX muxlislarning zo‘ravonlik harakatlarini qoraladi va rasmiylar bilan hamkorlik qilishga tayyorligini bildirdi. Meksika futbol federasiyasining tartib-intizom komissiyasi tergov boshlanganini e’lon qildi.
