Биринчи лига вакиллари — “Андижон” ва “Истиқлол” жамоалари ўртасидаги учрашувдан кейин иккала клуб бош мураббийлар ўйин тўғрисида ўз фикрларини билдиришди.

Азамат АБДУРАИМОВ (“Андижон” бош мураббийи):
— Учрашув тўғрисида нима дейишим мумкин? Ўйин бошидаги шижоатни футболчилар охиригача намойиш эта олишмади. Иккинчи голни урганимиздан кейин шогирдларим хотиржамликка берилишди. Бунинг натижасида ҳужумда бўш ҳаракат қилишди. Лупашко ва яна бир нечта футболчилар қулай имкониятлардан фойдалана олишмади. Ҳимоядаги хато туфайли дарвозамиздан тўп ўтказиб юбордик. Оқибатда футболчиларда бироз асабийлашиш бўлди. Ғалабани сақлаб қолган бўлсак-да ўйин осон ўтгани йўқ. Иккинчи таймда айрим етакчиларга бериш мақсадида бир қатор ёшларга имконият бердим. Шу боис Расул Раҳмонов, Баҳром Абдураҳимовни алмаштирдим. Лупашко эса жароҳатдан кейин ҳали ўз формасига кира олгани йўқ. Мавсум ҳали узоқ ва таркибдаги барча футболчиларга имконият беришимиз керак. Шу боис бу баҳсда Дилмурод Маҳмудов, Азиз Қаюмов, Шаҳбоз Жумабоев каби ёшларни биринчи марта асосий таркибга киритдик. Шунингдек, Акмал Жўрабоев мавсумга тайёргарликда жароҳат туфайли биз билан шуғуллангани йўқ. Шунинг учун уни иккинчи бўлимларда майдонга тушириб формасини тиклаб олиш имконини беряпмиз.