Франция ҳукумати хавфсизликка таҳдидлар туфайли 3922 кишининг Париж Олимпиадаси тадбирларига бориши тақиқланганини айтди.

131 киши давлат хавфсизлигига жиддий таҳдид соладиган шахслар рўйхатига киритилган.

"Маъмурий тергов соҳасида олиб борилаётган жамоавий ишни эътироф этмоқчиман. Айни пайтда биз 870 000 та текширув ўтказдик, Олимпия ўйинларининг биринчи кунида биз миллионта текширув ўтказишга улгурамиз.

Биз 3922 та тақиқ ўрнатдик, яъни бу одамларнинг Олимпия ўйинларига киришини тақиқладик", — деди Франция ички ишлар вазири Жералд Дарманин.

Бир неча ой давомида хавфсизлик бўйича мутахассислар Олимпия ва Паралимпия ўйинлари ташкилий қўмитаси ёки ўйинлар ўтказиладиган префектуралардан келган юз минглаб аккредитация сўровларини кўриб чиқишди.

Текширувларнинг мақсади хавфсизликни таъминлашдан иборат бўлади.

Таъкидланишича, тақиқланганлар орасида 131 киши давлат хавфсизлигига жиддий хавф туғдирувчи шахслар рўйхатига кирган, 18 нафари радикал исломчилар, 167 нафари чаплардан, 80 нафари ўнглар ҳисобланади.