Канада Олимпия қўмитаси Канада аёллар футбол терма жамоаси бош мураббийи Бев Пристманни дрон кузатуви билан боғлиқ можаро туфайли четлатганини эълон қилди.
Канада делегацияси аъзоси бошқарган дрон Олимпиада турнири ўйинидан бир неча кун олдин Янги Зеландия терма жамоаси машғулотлари вақтида осмонда кўринди. Пристман воқеа учун масъулиятни ўз зиммасига олди ва ўйинни ўтказиб юборди. Халқаро футбол федерасияси тартиб-интизом қўмитаси ушбу ҳолат юзасидан текширув бошлади.
"Сўнгги 24 соат ичида биз Париж Олимпиадаси олдидан рақибларга қарши дронлардан фойдаланиш ҳақида қўшимча маълумот олдик. Ушбу янги фактларни ҳисобга олган ҳолда, биз аёллар миллий футбол жамоаси бош мураббийи Бев Пристманни Олимпиада охиригача ва яқинда эълон қилинган мустақил текширувимиз якунлангунга қадар тўхтатиб туришга қарор қилдик" - деди Канада футбол ассоциацияси бош директори Кевин Блю.
Жамоани Олимпиаданинг қолган ўйинларида ёрдамчи мураббий Энди Спенс бошқаради.
Бир кун аввал Канада Янги Зеландияни 2:1 ҳисобида мағлуб этди.
