Бу йилдан “Машъал” футбол клуби қошида “Mashal-Women” деб номланган қизлар жамоаси ташкил қилингани ҳақида сайтимиз орқали аввал хабар бергандик. Мана шу жамоа кеча ва бугун кетма-кет иккита расмий учрашув ўтказди.

Яъни, аёллар футболи бўйича Ўзбекистон Кубогининг биринчи босқичида “Mashal-Women” Сурхондарёнинг “Сурхон” жамоасига қарши майдонга тушди. Муборакда ўтказилган биринчи ўйинда “Mashal-Women” вакиллари 9:0 ҳисобида зафар қучишди. Аслида жавоб беллашуви “Сурхон” майдонида ўтказилиши лозим эди, бироқ меҳмонлар шунча узоқ йўл босиб келганга яраша жавоб учрашувини ҳам ўтказиб кетишни маъқул кўришди ва эртаси куни Қаршидаги “Меҳнат” стадионида Кубокнинг жавоб баҳси ўтказилди.

Қизиғи шундаки, муборакликлар иккинчи беллашувда ҳам 9:0 ҳисобида ғалаба қозонишди. Биринчи ўйинда Қудратова Нилуфар 6та гол урган бўлса, иккинчи баҳсда Нормуродова Ситора 6та гол уришнинг уддасидан чиқди. Шу тариқа “Mashal-Women” иккала ўйин натижасига кўра “Сурхон” қизларидан 18:0 ҳисобида устун келиб, Кубокнинг кейинги босқичига йўл олди.

Эслатиб ўтамиз, айни пайтда “Mashal-Women” жамоасига Баҳром Норсафаров бош мураббийлик қилмоқда.