Париждаги Олимпия ўйинларининг очилиш маросимида ўзига нисбатан ўлим таҳдиди билан боғлиқ вазиятни кўрган айрим ташкилотчилар прокуратурага мурожаат қилган. Бу ҳақда Le Parisien нашри хабар бермоқда.

Очилиш маросимини ўтказган Paname 2024 компанияси электрон почта орқали бир қанча ҳақоратомуз хабарлар олди, жумладан, таҳдидчилар Қуръон оятидан иқтибос келтирган ва маросим ташкилотчиларига “Аллоҳнинг жазоси” келишини тилашган.

2 август куни Париж прокуратураси Олимпия ўйинларининг очилиш маросимининг бадиий раҳбари Томас Жоллига қарши онлайн таҳдидлар туфайли тергов бошланганини маълум қилганди. У ҳам худди шундай хатларни олган.