Германия терма жамоаси ҳужумчиси Никлас Фюллькруг Дортмунднинг "Боруссия" клубидан Лондон клубига расмий ўтганидан сўнг "Вест Хэм" матбуот хизматига ўзининг биринчи интервюсини берди.
"Бу ерда эканлигимдан хурсандман ва янги жамоадошларим билан майдонга тушишни интиқлик билан кутаман. Ўйлайманки, Премьер-лига дунёдаги энг яхши лига ва мен учун ҳозир Англияга кўчиб ўтиш ва "Вест Хэм" каби катта клубда ўйнаш вақти келди.
Мен узоқ вақтдан бери “Вест Хэм” ҳақида ўйладим. Мен жамоанинг техник директорини яхши биламан, "Вердер"да умумий тарихимиз бор ва мен баъзи ўйинларни томоша қилдим ва бу жамоа қанчалик яхши эканини кўрдим", - дея форварднинг сўзларини келтиради клуб матбуот хизмати.
