«Атлетико» Хулиан Альвареснинг трансферига Жоау Феликсни қўшмоқчи.
Мадрид клуби раҳбарияти «Манчестер Сити»га 24 ёшли португалиялик вингерни сотиб олиш имконияти билан ижарага беришни, шунингдек, Хулиан Альвареснинг трансфери учун қўшимча тўловни таклиф қилмоқда.
2021 йилда «Сити» Жоау Феликсга қизиқиш билдирган эди, аммо трансфер охир-оқибат амалга ошмади.
Шу билан бирга, «шаҳарликлар» раҳбарияти Альваресни клубда сақлаб қолмоқчи ва унинг трансферини 75 миллион фунт ва яна 10 миллион бонусга баҳоламоқда.
Хабар қилинишича, Альварес испан клубига ўтишга қизиқмоқда ва аввалроқ «Манчестер Сити»нинг асосий ўйинларида етарлича ўйнамаганидан норозилигини билдирганди.
Аргентиналик футболчи ўтган мавсумда АПЛда 36 та ўйинда майдонга тушиб, 11 та гол урди ва 9 та голли узатмани амалга оширди.
Жоау Феликс «Барселона» сафида Ла Лигада 30 та ўйинда 7 та гол ва 3 та голли узатмага муаллифлик қилган.