"Навбаҳор" ва "Гулистон" ўртасидаги баҳсдан (3:0) кейин бош мураббийлар ўз фикрлари билан ўртоқлашишди. Наманганликлар бош мураббийи Мустафо Байрамов футболчилардаги иштиёқ туфайли ғалаба қўлга киритилганини таъкидлаб ўтди.

Мустафо Байрамов:
«Зарафшондаги ғалабадан кейин Гулистон билан ўйинда ҳам фақат ғалабани кўзлагандик. Гарчи сафарда уч очко қўлга киритилган бўлса-да, жуда қийин ўйин ўтганди. Шаҳарлар орасидаги масофани узоқлигига ҳам футболчиларимиз бироз бўлса-да толиқиб қолишганди. Шунга қарамай, бугун ғалаба учун қўлларидан келганича ҳаракат қилиб, мухлисларни хурсанд қилишни уддасидан чиқишди. Келгуси ўйинларда ҳам ғалабалар билан ишқибозларимизни мамнун қиламиз. Бугунги учрашувда барча футболчилар ўзларини кўрсатишди. Шу сабабли уларга раҳмат айтаман. Баҳс давомида рақибга нисбатан кучлироқ ҳаракат қилганимиз учун ҳақли равишда уч очкони қўлга киритдик деб ўйлайман».