"Навбаҳор" ва "Гулистон" ўртасидаги баҳсдан (3:0) кейин бош мураббийлар ўз фикрлари билан ўртоқлашишди. Гулистонликлар бош мураббийи Бахтиёр Ашурматов "Навбаҳор"нинг кучли жиҳатларига тўғри баҳо берилмагани учун жамоа мағлубиятга учраганини таъкидлади.

Бахтиёр Ашурматов:
«Биринчи навбатда қўлга киритилган ғалаба билан «Навбаҳор» футболчилари ва мухлисларини табриклайман. Учрашувнинг қийин кечишини билардик. Наманганликларнинг ўйин услуби «Локомотив» аъзоларидан сўраганимда, улар кучли ўйин кўрсатишини айтиб ўтишганди. Бу ҳақда футболчиларга тушунтиргандим. Ўйин хусусида нима ҳам дейишим мумкин. «Навбаҳор» шогирдларимга қараганда мазмунлироқ ва кучли ўйин кўрсатди. Шу сабабли уч очкони қўлга киритди. Балки биз «Навбаҳор»нинг кучли томонларини тўғри талқин қила олмагандирмиз. Мағлубиятда ўзимни айбдор деб биламан. Келгусида хатоларимизни бартараф этиш устида иш олиб борамиз».