"Арсенал" бош мураббийи Микель Артета ҳужумчи Эдди Нкетианинг клубдаги келажаги ҳақидаги саволга жавоб берди.
Аввалроқ 25 ёшли англиялик футболчига "Наполи" ва бошқа Европа клублари қизиқиш билдираётгани ҳақида хабар берилганди.
"Ҳозирда таркибда бўлган ва мавсумолди тайёргарликда иштирок этаётган барча футболчиларнинг клубда қолиш имконияти юқори. Шунинг учун улар биз билан", - деди Артета.
Нкетиа - "Арсенал" жамоаси тарбияланувчиси. 2023/24 йилги мавсумда форвард "канонирлар" сафида 37 та ўйинда қатнашиб, 6 та гол урди ва 3 та голли узатмани амалга оширди.
Футболчининг клуб билан шартномаси 2027 йилнинг июнь ойи охиригача амал қилади. Transfermarkt портали ҳужумчининг нархини 30 миллион еврога баҳоламоқда.
