"Манчестер Сити" иши бўйича тингловлар яқин ойларда бошланади.
Маълумки, 2023 йилнинг февралида клуб 115 марта молиявий қоидаларни бузганликда айбланган эди. Бу йил ёзда АПЛда ишлаган ёки ишлаётган клублар хўжайинлари ва менежерлари ўз фикрлари билан ўртоқлашди. Кўпчилик буни аноним равишда қилди.
The Athletic нашри ҳисоботида таъкидланишича, бир гуруҳ одамлар "Манчестер Сити"га спорт санкциялари ўрнига пул жаримаси қўлланилиши эҳтимолидан хавотирда. Бу мансабдорлар гуруҳи ишнинг кўламини ҳисобга олсак, бундай қарор ғайритабиий бўлади, деб ҳисоблайди.
"Мен эшитган жамоавий нуқтаи назарга кўра, "Манчестер Сити"дан жуда кўп очко олиб қўйилиши керак - 70-80. Бу уларнинг Чемпионшипга тушиб кетишини таъминлайди", - деди Премьер-лига клуби раҳбарларидан бири.
Яна бир функционер жазо янада креатив бўлишини таклиф қилди – кейинги уч мавсумнинг ҳар бирида "Манчестер Сити"дан очколар олиб қўйилиши мумкин. Бу эса жамоанинг Чемпионлар лигасига йўл олиш имкониятига путур етказади.
