Миланнинг “Интер” клуби дарвозабони Янн Зоммер Швейцария терма жамоасидаги фаолиятини якунлашга қарор қилганидан сўнг хайрлашув нутқи билан чиқди.

35 ёшли дарвозабоннинг терма жамоани тарк этиши душанба куни маълум бўлди.

"Мен синчиклаб ўйлаб, шундай қарорга келдим. 12 йил давомида юртим байроғини энг юқори савияда намоён этиш мен учун катта шараф эди.

Кўп унутилмас лаҳзалар, ғалабалар, ҳаяжонли ўйинларни ғурур билан эслайман, шунингдек, биргаликда енгиб ўтган қийинчиликларни эслайман.

Жаҳон ва Европа чемпионатларининг финал босқичида ўйнаш имкониятига эга бўлдим, у ерда тўрт марта 1/8 финалга чиқдик ва икки марта чорак финалда ўйнадик.

Бу хотираларнинг барчаси менинг қалбимда алоҳида ўрин тутади", - дея Зоммернинг сўзларини келтиради Швейцария футбол ассоциацияси.