"Манчестер Сити" клуби жамоадан кетган Хулиан Альвареснинг ўрнига янги форвард сотиб олишга шошилмаяпти.
“Шаҳарликлар” аргентиналик футболчини “Атлетико Мадрид”га сотиб юборишди, энди Пеп Гвардиола ихтиёрида фақат битта марказий ҳужумчи бор – Эрлинг Холанд. City Xtra нашри журналист Майкл Грантга таяниб хабар беришича, "Манчестер Сити" янги форвардни зудлик билан сотиб олишга эҳтиёж сезмаяпти. Клуб ҳужум позициясини, керак бўлса, ҳозирги таркибдаги турли ўйинчилар эгаллаши мумкин, деб ҳисоблайди.
Шу билан бирга, манбанинг ёзишича, Англия чемпионининг “Селтик” ҳужумчиси Кёго Фурухасига қизиқиши ҳақидаги миш-мишлар асосли. "Сити" японияликни кузатиб бормоқда, бироқ ҳозирча аниқ маълумотга эга эмас.
