Футбол бўйича Ўзбекистон Суперлигасининг 17-турида “Локомотив” ва “Қизилқум” ўртасидаги баҳс 25 август, якшанба куни бўлиб ўтди.

Учрашувнинг 11-дақиқасида “темирйўлчилар” футболчиси Жасурбек Ҳакимов ҳисобни очди. 15-дақиқада Шодиёр Шодибоев ҳисобни ишончли кўринишга олиб келди. Орадан 3 дақиқа ўтиб, Сардор Абдунабиев ҳам ўз номини таблога ёздириб қўйди. 22-дақиқада Михаил Гашенков ўйиндаги тўртинчи голга муаллифлик қилди. 36-дақиқада Элгужа Лобжанидзе ҳисобни қисқартирди.

Иккинчи бўлим бошида навоийликлар пеналти ишлаб олди. Лобжанидзе 54-дақиқада пенальтини аниқ амалга оширди.

Қолган дақиқаларда дарвозалар ишғол этилмади ва “Локомотив” 4:2 ҳисобида ғалаба қозонди.