Испаниянинг Мальорка шаҳрида теннис бўйича «Челленжер» туркумига кирувчи «Rafa Nadal Open by Movistar» турнирининг саралаш баҳсларидан ҳамюртимиз Ҳумоюн Султонов муваффақиятли ўтди.
Мамлакатимизнинг биринчи рақамли теннисчиси саралашнинг финал учрашувида франциялик Саша Геймар Ваенбургни ҳар иккала сетда бир хил 6:4 ҳисобида мағлубиятга учратди. Шу тариқа, Ҳумоюн Султонов асосий тўр баҳсларининг биринчи даврасида яна бир франциялик ракетка устаси Робен Бертран билан куч синашадиган бўлди.
Шунингдек, Ҳ.Султонов «Rafa Nadal Open by Movistar» турнирнинг жуфтлик баҳсларида чехиялик Марек Генгель билан тандемда АҚШ вакиллари ака-ука Жек ва Жейми Ванс устидан 6:1, 6:4 ҳисобида зафар қучди ва чорак финалга йўл олди. Энди Ҳумоюн ва Марек ярим финал йўлланмаси учун Буюк Британия шарафини ҳимоя қилаётган Маркус Уиллис ҳамда Чарлз Брум дуэти билан рақобатлашади.
