Кеча, 31 август куни Испания чемпионатининг 4-туридан ўрин олган “Валенсия” ва “Вильярреал” учрашувида дуранг қайд этилди – 1:1.

Голларга Уго Дуро (24) ва Айосе Перес (45+3) муаллифлик қилишди.

Бу дуранг “Валенсия”га жорий мавсумдаги илк очкосини келтирди, бунгача “Атлетик” (0:1), “Сельта” (1:3) ва “Барселона” (1:2) билан ўйинларда учта мағлубият аламини тотиб кўрган эди.

Ла Лиганинг дастлабки 4 турида қўлга киритилган 1 очко клубнинг 21-асрдаги иккинчи энг ёмон натижаси ҳисобланади.

2016/17 йилги мавсумда бундан ҳам ёмонроқ старт қайд этилганди, ўшанда Пако Аестаран бошчилигидаги жамоа 0 очко жамғарганди. Натижада у ишдан бўшатилди ва унинг ўрнига 30 декабргача ишлаган Чезаре Пранделли таклиф қилинди.

Жамоа мавсумни Воро билан якунлади, бу эса “кўршапалаклар”нинг 12-ўринни эгаллашига ёрдам берди.