"Наполи" ҳужумчиси Виктор Осимхен "Галатасарой" билан шартнома имзолаш бўйича музокараларни бошлади, дея хабар беради клуб расмий сайти.

Туркия клуби 25 ёшли нигериялик футболчини ижарага олганини маълум қилди. “Галатасарой” яқин кунларда бу трансферни расман эълон қилади.

Осимхен ёзги трансфер ойнасида клубини ўзгартиришга ҳаракат қилди, бироқ ҳеч бир жамоага ўтиш борасида келиша олмади. Натижада, "Наполи" нигериялик футболчини мавсум давомида ўз таркибидан чиқариб ташлади.

Ҳужумчи неаполликлар сафида 2020 йилдан буён ўйнаб келмоқда. У жамоа сафида 133 та ўйин ўтказиб, 76 та гол урган ва 18 та голли узатмани амалга оширган.