Нидерландия терма жамоаси бош мураббийи Рональд Куман вингер Стивен Бергвейн фаолиятини Саудия Арабистонида давом эттиришга қарор қилганидан сўнг уни терма жамоага чақирмаслигини айтди.
Олдинроқ 26 ёшли Бергвейн "Аякс"дан "Ал-Иттиҳод"га ўтгани маълум бўлганди. Трансфер суммаси 21 миллион евродан кўпроққа баҳоланмоқда.
"Унинг учун бу бўлим аслида ёпиқ. У менинг бу ҳақда нима деб ўйлаётганимни билади. 26 ёшда сизнинг асосий амбициянгиз пул эмас, спорт бўлиши керак. Футболчилар танлашади.
Мен ҳеч қачон бундай ҳолатга тушмаганман, чунки менда "Барселона"га бориш имконияти бўлган. У "Аякс"да қолиши мумкин эди ва бу ёмон бўлмасди, шундай эмасми? Сиз футболчиларнинг танловини ҳурмат қилишимиз керак, лекин шахсан мен бу трансферни амалга оширмасдим" - деди Куман матбуот анжуманида.
Бергвейн Нидерландия терма жамоаси сафида 35 ўйинда 8 та гол урган.
