"Реал Мадрид"нинг 21 ёшли ҳужумкор ярим ҳимоячиси Жуд Беллингем ўзининг ижтимоий тармоқдаги аккаунтида YouTube канали очилганини эълон қилди. 12 сентябрдан бошлаб у жамоадаги биринчи йили ҳақида ҳикоя қилувчи видеоларни жойлаштиради.
Беллингем йил давомида турли лаҳзаларни суратга олганини таъкидлади. Мини-сериал тўрт қисмдан иборат бўлиб, уларнинг ҳар бири ҳафтада бир марта чиқарилади.
"Умид қиламанки, сизга видеолар ёқади ва обуна бўлишни унутманг", деб ёзди Беллингем.
Ярим ҳимоячи 2023 йилнинг ёзида Дортмунднинг "Боруссия"сидан "Реал"га ўтган эди. Бу даврда у барча турнирларда 44 та ўйин ўтказиб, 23 та гол ва 14 та голли узатмани амалга оширган.
