Аргентинанинг мағлубиятсиз серияси Колумбияда якунланди.
Лионель Скалони шогирдлари жаҳон чемпионати саралаш баҳсида мағлуб бўлишди – 1:2. 25-дақиқада Ерсон Москера колумбияликларни ҳисобда олдинга олиб чиқди, бунга меҳмонлар иккинчи бўлим бошида Николас Гонсалеснинг аниқ зарбаси билан жавоб қайтаришди. Учрашув тақдирини 60-дақиқада пенальтини голга айлантирган Хамес Родригес ҳал қилди.
Амалдаги жаҳон чемпионлари учун бу ўтган йилнинг ноябрь ойидан бери биринчи мағлубият эди - ўшанда "албиселесте" Уругвайдан мағлуб бўлган (0:2). Аргентиналикларнинг мағлубиятсиз серияси 12 ўйин давом этди.
