Суперлиганинг 18-турида мухлислар навбатдаги бор «ўзбек класикоси»га гувоҳ бўлишади. «Нефтчи» Тошкентда «Пахтакор» меҳмони бўлади.

Жамоалар чемпионатлар тарихида 59 ўйин ўтказишган. Кичик устунлик «Пахтакор» тарафида - 28 ғалаба, 9 дуранг ва 22 мағлубият. Рақиб дарвозасига 97 тўп киритган "Шерлар" 70 тўп ўтказиб юборишган. Тошкентдаги беллашувларнинг 21 тасида «Пахтакор» устун келган бўлса, 6 баҳсда фарғоналиклар ғалаба қозонган. Икки ўйин дуранг билан тугаган. Тошкентликлар уйдаги тўқнашувларда 59 гол урган ҳолда 17 тўп ўтказиб юборган. «Пахтакор» 10 бор рақибни йирик натижа билан доғда қолдиришга эришган бўлса, «Нефтчи»да бундай ғалабалар сони учтани ташкил қилади.

Шунингдек, клублар Ўзбекистон Кубогида 15 учрашув ўтказганлар ва «Пахтакор» уларнинг 12 тасида устун келган. 3 беллашувда рақибнинг ютуғи кузатилган. "Пахтакор-79" хотира турнири ва "Тошкент халқаро турнири" финалларида ҳам жамоаларнинг тўқнашуви рўй бериб, уларда "шерлар" муваффақиятга эришган.

«Пахтакор»нинг энг йирик ғалабаси 6:0, «Нефтчи»да эса 4:0 ҳисобланади. Рустам Дўрмонов ўзаро учрашувларда 12 тўп киритган. Шуҳрат Мақсудов эса ҳар икки жамоа таркибида гол урган ягона ўйинчи саналади.

«Пахтакор» ва «Нефтчи» ўртасидаги ўзбекона мумтоз тўқнашув 13 сентябрь, жума куни "Жар" стадионида соат 19:30да бошланади.