"Арсенал" ярим ҳимоячиси Жоржиньо катта эҳтимол билан Италия терма жамоасидаги сўнгги ўйинини ўтказиб бўлди.

32 ёшли футболчини Лучано Спалетти Евро-2024 учун "скуадра адзурра" қайдномасига киритди. Футболчи турнирда 3 та ўйин ўтказди. Журналист Лоренцо Беттони фикрича, ҳаммаси Италия терма жамоаси бош мураббийи Жоржиньони бошқа таклиф қилмаслигидан далолат беради. Жамоа янги циклни бошлади ва 3-5-2 схемасига ўтди. Майдон марказида энди бошқа футболчиларга ишонч билдирилади.

Жоржиньо Италия терма жамоаси сафида 57 та ўйин ўтказиб, 5 та гол ва 3 та голли узатмага муаллифлик қилган. Ярим ҳимоячининг дебюти 2016 йилнинг март ойида Антонио Конте қўл остида бўлган.