"Бунёдкор" сафида "Поханг Стилерз" дарвозасини ишғол қилган Олександр Пишур учрашувдан кейин биз билан суҳбатда бўлди.
- Ғалабага тенг дуранг билан табриклаймиз. Гуруҳ босқичи ҳақида қандай фикрдасиз?
- Кучли жамоалар билан ўйнаб, ўзимизни ҳам синаб олдик. Шунингдек, толиқишларга сабаб бўлувчи парвозларни амалга оширишга тўғри келди. Шунга қарамасдан олдимизга қўйилган минимум вазифани бажара олдик. Қувонарлиси шундаки, кейинги босқичга биринчи ўрин билан чиқдик. Бу эса бироз устунлик беради.
- Жанубий Корея жамоаси Сизда қандай таассурот қолдирди?
- "Поханг Стилерз" гуруҳдаги рақибларимиз ичида энг кучли жамоа бўлди. Улар билан ўйнаган иккала учрашувимиз ҳам осон бўлмади. Муваффақиятга эришиш ҳар доим ёқимли. Мухлисларимизга қувонч улашганимиздан хурсандман.
- Ҳозирча мусобақада учта тўп киритдингиз. Бугунги голингизга қандай изоҳ берасиз?
- Ҳимоядан ҳужумга жуда тез суратда ўтдик. Лутфулла Тўраев аниқ паси билан Алибобо Раҳматуллаевни олдинга бошлади. Оширилган пасни Дилшод Жўраев тўпни дарвозага тўғрилаб юборишда аниқ ўйнай олмади. Бироқ Дилшод ҳимоячини чалғитди. У ҳам тўпни тўхтатиб қололмади. Якуний зарбани йўллаш менга насиб этди. Яқин масофадан осонлик билан тўпни тўрга жойладим.
Мирзахаким Тўхтамирзаев
Поханг, Жанубий Корея
