Тошкентнинг “Бунёдкор” жамоаси Осиё Чемпионлар лигасида 50-учрашувини ўтказди.

“Қалдирғочлар” қитъамизнинг клублар ўртасидаги энг нуфузли турнири – Осиё Чемпионлар лигасида кетма-кет олтинчи мавсум иштирок этишмоқда. “Поханг Стилерз” билан ўтган баҳс “Бунёдкор”нинг Осиё Чемпионлар лигасидаги 50-учрашуви сифатида тарихда қолди. Тошкентликлар шу ўйинларнинг 22тасида ғалаба, 14та дуранг ва шунча мағлубият қайд этишган. Тўплар фарқи – 66:58. Жамғарилган очколари сони эса 80тани ташкил этади.

Клуб ўз тарихида иккинчи бор гуруҳ босқичини 1-ўринда якунлади. Даставвал, 2008 йилги турнир дебютанти бўлган “қалдирғочлар” ўша пайтда қитъамизнинг гегемон жамоалари ҳисобланган “Ал-Иттиҳод” (Саудия Арабистони), “Сепаҳон” (Эрон) ва “Ал-Иттиҳод” (Сурия) клубларини доғда қолдириб, плей-оффга биринчи ўрин билан йўлланма олганди. Жорий мавсумда эса Шарқий минтақанинг гранд клублари – “Бейцзин Гоань” (Хитой), “Поханг Стилерз” (Жанубий Корея) ва “Санфречче Хиросима” (Япония) жамоалари гуруҳ босқичини “Бунёдкор”дан кейинги поғоналарда якунлашди.

Таъкидлаш жоизки, “Бунёдкор” плей-оффга биринчи ўрин билан йўлланма олган мавсумлар Миржалол Қосимов бош мураббийлик қилган даврга тўғри келади. Шунингдек, клуб тарихида хозирча энг яхши кўрсаткич бўлиб турган ярим финалларига ҳам айнан Миржалол Қосимов 2008 ва 2012 йилларда ўз шогирдлари билан етиб келган.