Хориж чемпионатларида тўп сураётган Ўзбекистон миллий терма жамоасининг бир нечта аъзолари ўтаётган ҳафтанинг дам олиш кунлари ўз клублари сафида расмий ўйинларда майдонга тушишди.
РОССИЯ
Маҳачқалъанинг «Анжи» клуби ярим ҳимоячиси Одил Аҳмедов Россия премьер-лигасининг якунига етган турида ўз майдонида Қозоннинг «Рубин» клубига қарши учрашувнинг асосий таркибидан жой олмади. Ўзбекистон миллий терма жамоаси ярим ҳимоячиси ўйиннинг 90-дақиқасида захирадан майдонга тушган. Учрашувда 2:1 ҳисобида «Анжи» ғалаба қозонди. Қозоннинг «Рубин» клуби ярим ҳимоячиси Вагиз Галиулин эса, мазкур учрашув қайдномасига киритилмаган.
Москванинг «Локомотив» клуби ҳимоячиси Виталий Денисов навбатдаги турда ҳам ўз жамоаси асосий таркибида майдонга тушди. Москва «темирйўлчилари» 5 май куни куни сафарда «Кубань» клубига қарши тўп сурди ва 4:2 ҳисобида ғалаба қозонди. Денисов учрашувда тўлиқ 90 дақиқа ҳаракат қилган.
ҚОЗОҒИСТОН
5 май куни апрель Қозоғистон премьер-лигасида 8-тур учрашувлари бўлиб ўтди. Ўзбекистон миллий терма жамоаси ҳужумчииси Улуғбек Бақоев тўп сураётган Павлодарнинг «Иртиш» клуби премьер-лиганинг якунига етган турида ўз уйида «Тараз» жамоасига қарши тўп сурди ва 1:0 ҳисобида ғалабага эришди. Бақоев ушбу учрашувда 90 дақиқа ҳаракат қилган.
Уч нафар ўзбекистонлик футболчилар — Марат Бикмаев, Александр Гейнрих ҳамда Темур Кападзе тўп сурадиган «Актобе» клуби 5 май куни ўз майдонида «Тобол» жамоаси устидан 1:0 ҳисобида ғалаба қозонди. Кичик жароҳатидан тузалиб сафга қайтган Темур Кападзе ушбу учрашувда 90 дақиқа ҳаракат қилган бўлса, ўйинни асосий таркибда бошлаган Александр Гейнрих 83-дақиқада алмаштирилди. Миллий терма жамоага номзод бўлган футболчилардан бири Марат Бикмаев эса, учрашувнинг 13-дақиқасида жароҳат олиб майдонни тарк этган.
ХИТОЙ
4-5 май кунлари Хитой суперлигасида 8-тур учрашувлари бўлиб ўтди. Ушбу турнинг эътиборга молик учрашувларидан бири «Бейцзинг Гоан» ҳамда «Чангчун Ятай» жамоалари ўртасида кечди (2:0). Ҳар иккала жамоа таркибида эса, Ўзбекистон миллий терма жамоасига номзод футболчилар - Анзур Исмоилов («Чангчун Ятай») ва Егор Кримец («Бейцзинг») тўп суришади. Мазкур учрашувда Кримец ўз жамоаси асосий таркибига киритилмади. Анзур Исмоилов эса «Чангчун Ятай» сафида тўлиқ 90 дақиқа ўйнаган.
Миллий терма жамоага номзод бўлган ҳимоячилардан бири Шавкат Муллажонов Хитой чемпионатининг якунига етган турида, ўз жамоаси - «Лиаонинг» жамоаси сафида асосий таркибда майдонга тушди ва тўлиқ 90 дақиқа ўйнади. «Лиаонинг» ушбу турда сафарда «Шанхай» устидан 2:1 ҳисобида ғалаба қозонди.
Бу йилдан эътиборан Хитой суперлигасида фаолиятини давом эттираётган ўзбекистонлик футболчилардан яна бири Шерзод Каримов «Циндао» клуби сафида учрашувнинг 90-дақиқасида майдонга туширилди. Жамоа ўз майдонида «Ханжоу»га 0:1 ҳисобида имкониятни бой берди. Ўзбекистон миллий терма жамоасига номзод ҳимоячилардан бири Камолиддин Тожиев тўп сураётган «Жиангсу Сэйнти» клуби эса ўз учрашувини 6 май куни ўтказади.
ЖАНУБИЙ КОРЕЯ
Жанубий Кореянинг «Сеонгнам Ильва Чунма» клуби 5 май куни сафарда Жанубий Корея «К-Лига»си пешқадами «Похан Стилерз» клуби билан ўйнади ва 0:1 ҳисобида имкониятни бой берди. Хабарингиз бор, «Сеонгнам» сафида Ўзбекистон миллий терма жамоаси сардори Сервер Жепаров тўп суради. Жепаров ушбу учрашувда 90 дақиқа ҳаракат қилди.
БАА
Тошкентда "Пахтакор"ни мағлубиятга учратиб, ОЧЛ нимчорак финалига чиққан "Аш-Шабоб" клуби бугун Президент кубогининг ярим финалида "Ал-Ваҳда" билан куч синашади. Азиз Ҳайдаров жамоадошлари мавсум сўнгида ана шу мусобақада ғолибликни қўлга киритишни мақсад қилишган. Азиз Тошкентда бўлиб ўтган "Пахтакор"га қарши ўйинда 90 дақиқа давомида ҳаракат қилди.
