Ҳужумчи Килиан Мбаппе октябрь ойидаги Франция терма жамоаси футболчилари чақирилган рўйхатда бўлмайди.
L’Equipe нашрининг хабар беришича, Дидье Дешам футболчи ва "Реал Мадрид" билан келишилган ҳолда Мбаппени чақирмайди. "Уч ранглилар" сардори Мадридда қолади ва ўз формасига қайтишга ҳаракат қилади.
Хабарингиз бор, Мбаппе яқинда "Алавес"га қарши ўйинда жароҳат олганди. Футболчи "Атлетико"га қарши дербини ўтказиб юборди, аммо Чемпионлар лигасида "Лилл"га қарши ўйнай олди (Килиан 57-дақиқада захирадан майдонга тушди). Очиғи, Мбаппе ҳали юз фоиз тайёр эмас. Франция терма жамоаси октябрь ойида Миллатлар лигаси доирасида Исроил ва Бельгия терма жамоаларига қарши майдонга тушади.
