Каталониянинг “Барселона” клуби ва футбол бўйича Испания терма жамоасининг собиқ ярим ҳимоячиси Андрес Иньеста профессионал фаолиятини якунлаганини эълон қилди. Бу ҳақда у ижтимоий тармоқдаги саҳифасида маълум қилди.

39 ёшли ярим ҳимоячи 1996 йилдан 2018 йилгача "Барселона" тизимида тўп тепган. Бу даврда у катталар жамоаси сафида барча турнирларда 674 та учрашувда қатнашиб, 57 та гол ва 136 та голли узатмани амалга оширган.

Андрес шунингдек, Япониянинг "Виссел Кобе" сафида ҳам ўйнашга муваффақ бўлди, у ерда испаниялик барча турнирларда 134 та ўйинда қатнашиб, 26 та гол ва 25 та голли узатмани амалга оширди. Иньестанинг сўнгги клуби БААнинг “Эмирейтс” жамоаси бўлган.

Испания терма жамоаси таркибида Иньеста икки марта Евро ва жаҳон чемпиони бўлди.