Хабарингиз бор, «Реал» таркибида сўнгги вақтларда Икер Касильяс жароҳат олгани боис дарвозани Диего Лопес қўриқламоқда. Бироқ, Икер аллақачон жароҳатдан қутулган ва майдонга қайтишга тайёр, аммо, бош мураббий уни асосий таркибда майдонга тушираётгани йўқ эди ва бу ҳолатга куни кеча клуб ҳимоячиси Пепе ўзининг муносабатини билдириб, Моурнинг Касильясни ҳурмат қилиши лозимлигини айтиб ўтган эди. Ўз навбатида ушбу фикрга Моуриньо ҳам жавоб бермай қолмади.


Жозе Моуриньо: «Пепенинг фикрлари? Унинг нима деганини таҳлил қилиш жуда осон. Ҳозирда Пепени битта муаммо безовта қилмоқда ва бу муаммонинг номи: Рафаел Варан. 31 ёшли футболчи ўз ўрнини 19 ёшли футболчига бўшатиб бермоқда. Бу ҳаёт қонуни. Лекин, ким Варанга майдонда ишонч билдиришга ўзида куч топди. Албатта, мен».

Шунингдек, Моуриньо нима сабабдан Икердан кўра Диего Лопесга ишонч билдираётганини изоҳлаб ўтди.

«Мен дарвозабон сифатида Касильясдан кўра, Лопесни кўпроқ яхши кўраман. Бу шахсий қарор эмас ва мен билан Икер орамизда ҳеч қандай ёмон муносабат йўқ. Мен зарбаларни оёқ билан ҳам қайтара оладиган дарвозабонни ёқтирман. Икер дарвозада жуда кўплаб сейвларни амалга оширади, бироқ мен бошқачароқ дарвозабонни афзал кўраман»,- деб Моурнинг сўзларидан иқтибос келтирмоқда goal.com сайти.