Нигерия терма жамоаси аэропортдаги кечикиш ҳодисасидан кейин Ливиядан уйига қайтди.

Жамоалар 15 октябрь, сешанба куни Африка кубоги саралаш турнирида тўқнаш келишлари керак эди.

Учрашув Бенғозида бўлиб ўтиши керак эди, бироқ Нигерия жамоасининг самолёти ўйин ўтказиладиган жойдан икки соатча узоқликда жойлашган Ал Абрақ аэропортига йўналтирилди.

У ерда Нигерия терма жамоаси футболчилари 12 соатни овқат ва ичимликсиз ўтказдилар. Жамоа шунингдек, мезбон давлат уларни транспорт билан таъминламаганидан шикоят қилди.

Нигерия спорт вазирлиги футболчиларнинг «гаровга олинганини» маълум қилди. Ливия футбол федерацияси хавфсизлик протоколларига риоя қилинишини таъкидлади.

Жамоа душанба куни Нигерияга қайтди. У аввалроқ ушбу воқеа туфайли Ливия терма жамоаси билан ўйнашдан бош тортган эди.

Африка футбол конфедерациясининг бу ҳолатга муносабати ҳозирча маълум қилинмаган.

«Биз уйга соғ-саломат қайтдик. Мен жамоада 10 йил давомида жуда кўп нарсаларни кўрганман, лекин бунгача ҳеч қачон дуч келмаганман.

Ҳеч кимга бундай ёмон муносабатда бўлиш керак эмас. Футбол ҳурматдан иборат ва у ўзингни ҳурмат қилишдан бошланади», - дейди нигериялик ҳимоячи Уильям Трост-Эконг.