Саудия Арабистонининг «Ал-Ҳилол» клуби ҳужумчиси Неймар 2023 йилнинг 18 октябрь куни Бразилия терма жамоаси сафида Уругвайга қарши ўйинда оғир жароҳат олди ва узоқ вақтга сафдан чиқди.

Неймарнинг мазкур жароҳати ҳақида видео олинди ва футболчи интервью жараёнида ушбу жароҳат ҳақида гапира туриб, кўзларидан ёш оқа бошлади.

«Миллий жамоа сафида голлар сони бўйича Пеленинг натижасини яхшилайман, деб ҳеч қачон ўйламагандим. Бу — Пеле, тушуняпсизми? Бу ҳақда ўйлашим мумкин эмасди.

Ҳаётимда ажойиб вазиятларни бошдан кечирдим: бу мақсадга эришдим, «Ал-Ҳилол»га ўтдим, қизим туғилди... Мен учун йил ажойиб ўтаётган эди, кейин эса жароҳат олдим... (Неймар шу лаҳзада йиғлай бошлади).

Ўша вазиятни эслайман. Жароҳат олганимда кучли оғриқ ҳис қилдим. Ўша пайтда жароҳат жиддий эканини тушуниб етдим. Ҳаётда энг яхши кўрадиган нарсам — футбол ўйнаш. Майдондан ташқаридаги ҳар бир кун — бу қийноқ. Бу менга азоб беради», – деди Неймар.