13 май, душанба куни Тошкентдаги «Локомотив» стадионида Олий Лиганинг 8-тур ўйинларига якун ясалади. Унда темирйўлчилар ўз майдонларида Жиззахнинг «Сўғдиёна» клубини қабул қилади.

Ўтказилган етти турдан сўнг турнир жадвалини бошқариб турган «Локомотив» ушбу қарама-қаршиликда яққол фаворит деб айтсак хато бўлмайди. Бунга бир неча асослар бор.

Аввало, «Локомотив»нинг ушбу мавсумда қўлга киритиш имкони бўлган максимал 21 очкодан 19тасига эга чиқа олгани, мағлубиятсиз серияни ҳамон давом эттираётганини таъкдлаб ўтиш жоиз. Пойтахт клуби шу кунга қадар фақатгина бир учрашувда дуранг қайд этиб, қолган барча ўйинларни ғалаба билан якунлади. Бу учрашувларда "Локо" рақиблар дарвозасини 19 бора нишонга олган ҳолда, ўз дарвозасидан 6 марта тўп олиб чиққан. «Сўғдиёна» эса айни вақтда турнир жадвалининг 10-поғонасини банд этиб турибди. Жамоа 7 ўйинда 7 очко тўплаган.

Жамоаларнинг Олий Лига доирасида ўтказган ўзаро ўйинлари тарихига назар соламиз:

Ушбу икки клуб Олий Лига доирасида 10 бора рўбарў келишган. Ўзаро қарама-қаршиликларнинг 6тасида тошкентликлар ғалаба қилишган. Икки ўйинда жамоалар муроса кўчасини танлашган бўлишса, фақатгина икки ўйинда «Сўғдиёна» ғалабани нишонлаган. Ушбу ўзвро ўйинлардаги тўплар нисбати 18-5. Албатта, «темирйўлчилар» фойдасига.

Ушбу жамоаларнинг «Локомотив» майдонида ўтказилган ўйинлари статистикасига назар ташлайдиган бўлсак, кўплаб қизиқарли фактларга гувоҳ бўлишимиз мумкин. «Сўғдиёна» меҳмонда «Локомотив»ни бирор бора ҳам мағлуб этишни уддаламаган. Ҳали бирорта дуранг натижани ҳам қайд эта олганича йўқ. Яна ҳам қизиғи, «Локомотив» майдонида бўлган ўйинларда жиззахликлар ҳали бирор маротаба ҳам гол уришга муваффақ бўлишмаган.

Душанба куни ўтказиладиган ўйинда «Локомотив» ғалабага эриша олса, турнир жадвалидаги пкўқадамлигини яна ўзида сақлаб қолади. Акс ҳолда эса, ушбу турда «Навбаҳор»ни енгиб, очколари сонини йигирма биттага етказиб олган "Бунёдкор" биринчи ўринга қолади.