"Локомотив" - "Сўғдиёна" жамоалари ўртасидаги баҳсдан кейинги матбуот анжуманининг иккинчи қисмида мезбонлар бош мураббийи Ҳаким Фузайлов иштирок этди.

— Ўйин мухлислар учун қизиқарли бўлди, аммо биз — мураббийлар учун эмс. Ўйин бошидан ташаббусни қўлимизга олдик. Аммо вазиятлардан фойдалана олмаганимиз ҳафсаламни пир қилди. Бугун кўпроқ ҳужумкор тактика танлагандик. Эътибор берган бўлсангиз, икки нафар ҳужумчи ва ҳужумкор ярим ҳимоячи Санжар Турсуновни асосий таркибда туширдим. Мана шундай ўйинларда Ўзбекистон терма жамоа аъзоларини майдонга тушириб, уларнинг муҳим ўйинлар олдидан яхши формада бўлишини таъминлашга ҳаракат қиламан.

— Қайси вазиятда ғалабага ишондингиз: рақиб футболчиси майдондан четлатилгандан кейинми ёки биринчи гол урилганидан кейин?
— Ўйин бошиданоқ ғалабага шубҳа қилмагандим. Жамоалар сафидаги футболчиларни таққослаганда, бизнинг футболчиларнинг маҳорати юқори экани ҳеч кимга сир эмас. Ўйин бошидан фақат ҳужум қилишни таъкидлагандим. 70-дақиқагача бўлган ҳужумларни голга айлантира олмадик.

— Бугун "Сўғдиёна" футболчиси жароҳат олгани учун жиззахликлар тўпни атайлаб майдон ташқарисига чиқариб юборишди. Аммо шогирдларингизни фейр-плейга амал қилмади ва тўпни рақибга қайтариб бермади. Айнан шу вазиятдан кейин "Сўғдиёна" жарима тўпи ишлади ва тўпни дарвозабонга қайтариши оқибатида эркин тўп юзага келди...
— Ўша вазиятда тўпни рақибга қайтариб беришни айтгандим. Аммо ўйинчилар менинг овозимни эшитишмади, шекилли. Аслида эса тўпни қайтариб беришимиз лозим эди.