“Бурирам Юнайтед” – “Бунёдкор” учрашуви олдидан ташкил этилган матбуот анжуманининг иккинчи қисмида таиландликлар устози қатнашди.
- “Бурирам Юнайтед” Чемпионлар лигасининг 1/8 финалига йўлланма олиб, сезиларли ўсишга эришди. Бироқ биз бу йўлда тўхтаб қолмоқчи эмасмиз. Жамоамизда техникаси юқори бўлган футболчилар жудаям кўп. Ўйлашимча, энди тактик жиҳатга урғу берадиган палла етиб келди. Асосий жамоада тажрибали футболчилар кўп. Улар қаторига янги қон бўлувчи ёшларни жалб этиш фурсати ҳам келди, деб ўйлайман. Ички чемпионат – бошқа, халқаро мусобақа – умуман бошқа турнир эканлигини алоҳида таъкидламоқчиман. Осиё Чемпионлар лигасининг ҳар бир ўйинида катта эътибор, юқори маҳорат ва тактик омил муҳим аҳамиятга эга. Бош мураббий лавозимига келган бўлсам-да, жамоа ичида у қадар катта ўзгариш қилмоқчи эмасман. Аввалги мураббийдан менга яхши авлод қолди. Фақатгина жамоавий ўйинни шакллантириш керак. “Бунёдкор” – Осиё Чемпионлар лигаси гуруҳ босқичини муваффақиятли босиб ўтаётган ва икки карра ярим финалга етиб келган кучли жамоа. Рақибимиз таркибида чизиқлар бўйича жуда маҳоратли футболчилар жамланишган. Мураббийлар штаби ҳам жуда катта тажрибага эга. Шундай экан, бизни жуда қийин баҳс кутиб турибди. Бироқ биз ўз кучимизга ишонамиз ва рақибдан асло чўчимаймиз. Ўз майдонимизда ўйнаётганимиз кичик устунлик беради. Рақибни ҳурмат қиламиз, бироқ максимал натижани қайд этиш учун ҳаракат қиламиз, - дейди Скотт Купер.
Дарвоқе, биз “Бурирам Юнайтед”нинг ички чемпионатдаги энг яқин учрашуви санаси билан қизиқдик. Таиланд премьер-лигаси тақвимига кўра бурирамликлар 19 май куни меҳмонда “Бек Терро Сасано” жамоаси билан куч синашишлари керак. Бироқ Таиланд футбол ассоциацияси “Бурирам Юнайтед”ни ушбу баҳсни бошқа муддатга қолдириш борасидаги талабани ҳали қондирганича йўқ. Таиланд клуби 17 май куни 1/8 финалнинг жавоб учрашувини ўтказиш учун Тошкентга етиб келиб, тайёргарлик кўришни режалаштирган эди. Шунақа гаплар...
Мирзаҳаким Тўхтамирзаев,
Бурирам, Таиланд
