Шу йилнинг БААда бўлиб ўтадиган 17 ёшгача бўлган ўсмирлар ўртасидаги жаҳон чемпионатининг талисмани (рамзи)нинг тақдимот маросими ўтказилди. Кеча Дубай шаҳридаги "Бурж ал-Араб" биносида ўтказилган маросимда ФИФА ва маҳаллий ташкилий қўмита аъзолари ва БАА миллий терма жамоаси футболчиси Умар Абдулраҳмон иштирок этди.
"Шақрон" номли лочин мусобақа талисмани сифатида таништирилди. Сариқ лойин мамлакатнинг ҳам ўзига хос рамзи ҳисобланади. Амирликда лочин билан ов қилиш анъанага айланган.
"Мен мусобақанинг рамзи — "Шақрон"ни таништираётганимдан хурсандман. Лочин БАА мамлакатининг рамзи эканини кўпчилик билади. Унинг шарафига мусобақа талисмани сифатида лочин танланди", дейди мусобақа директори Муҳаммад Абдулла бин Бдуа. "Лочин кучли ва дадил қуш ҳисобланади. Ушбу икки хислат турнирда иштирок этадиган барча 24 жамоада мавжуд. Шунинг учун "Шақрон" бизнинг мусобақамиз рамзи учун идеал вариант ҳисобланади".
Ўсмирлар ўртасидаги ЖЧ БААнинг 6та шаҳридаги 6та стадионда бўлиб ўтади. Мухлислар 24та жамоа иштирокида 52та ўйинга гувоҳ бўлишади. Мусобақанинг қуръа ташлаш маросими 26 август куни Абу-Даби шаҳрида ўтказилади.
