«Пахтакор» Элит Чемпионлар Лигаси 4-турида 5 ноябрь куни Тошкентда Қатарнинг «Ар-Райян» жамоасини қабул қилади.

Ушбу клуб билан илгари тўқнаш келинмаган. «Райян» 8 карра Қатар чемпиони бўлиб, 6 бор Қатар Амири Кубоги, 4 марта Қатар Кубоги ва 5 марта Шайх Жассим Кубоги ғолибига айланган. Охирги чемпионлигини 2015-16 йилги мавсумла қўлга киритган. Жамоани маҳаллий мутахассис Юнус Али бошқариб келмоқда. Чемпионлар Лигаси учун «Райян» сафида қатарлик ўйинчилардан ташқари 12 нафар хорижлик футболчи рўйхатдан ўтказилган.

«Пахтакор» Қатарнинг бошқа жамоалари билан халқаро мусобақаларда фақат Чемпионлар Лигасида ўйнаган.

«Пахтакор»нинг Қатарнинг 5 клубига қарши жами 18 учрашувда майдонга тушган. «Гарафа» билан энг кўп дуч келган – 6 бор. «Садд» ва «Духайл» билан тўрт мартадан, «Қатар» СК ва «Араби» билан эса иккитадан учрашув ўтказилган. Бу ўйинларда 5 ғалаба, 5 дуранг ва 8 мағлубият кузатилган. Рақиблар дарвозалари 26 марта ишғол қилиниб, 29 тўп ўтказиб юборилган.

Тошкентда Қатар жамоаларига қарши етти беллашув бўлиб ўтган. Улар 4 ғалаба ва 3 дуранг қайд этилган. 14 тўп киритилган ва 6 гол қўйиб юборилган. Қуйида ”Пахтакор” билан тўқнаш келган Қатар клублари ва натижалар акс этган.

«Ал Гарафа» - 3:0, 3:4, 2:2, 2:0, 0:1, 1:2
«Қатар» СК - 1:0, 0:0
«Ал Садд» - 1:1, 1:2, 2:2, 1:2
«Ал Араби» - 3:1, 1:0
«Духайл» - 1:3, 2:2, 2:3, 0:3.