"Ливерпуль" бош мураббийи Арне Слот Германиянинг "Байер" клуби бош мураббийи Хаби Алонсо ҳақида гапирди. Испаниялик футболчи 2004-2009 йилларда "қизиллар" сафида тўп тепган.
"Бугун мухлислар менинг шарафимга қўшиқ айтиши менга ёқди. Бу мен учун ҳар доим алоҳида нарса бўлиб қолади. Аммо Хаби Алонсонинг олқишларга сазовор бўлгани ҳам бундан кам эмас. Хаби бу клуб учун алоҳида шахс. У мухлисларимиз томонидан илиқ кутиб олишга лойиқ", - дея Слот сўзларини келтиради "Ливерпуль" расмий сайти.
Бир кун аввал, 5 ноябрь куни "Ливерпуль" Чемпионлар лигаси умумий босқичи 4-тур учрашувида "Байер"ни мағлуб этди (4:0). Турнир жадвалида тўрт тур натижаларига кўра, "Ливерпуль" 12 очко билан биринчи ўринни эгаллаб турибди, "фармацевтлар" етти очко жамғариб, 11-ўринда бормоқда.
