Лерой Сане Премьер-лигага қайтиши мумкин.
«Бавария» вингерига «Арсенал» ва «Манчестер Юнайтед» клублари қизиқиш билдирмоқда. Футболчининг устувор варианти - фаолиятини «Бавария»да давом эттириш, деб хабар беради Bild.
28 ёшли футболчи Мюнхен клуби билан шартномани узайтириш борасида музокаралар олиб бормоқда.
Айни дамда Сане йилига 15 миллион евро ишлаб олади, бонусларни ҳисобга олсак, унинг маоши 20 миллионгача ошиши мумкин - футболчи ҳар 6 учрашув учун қўшимча 1 миллион евро олади.
Агар «Бавария» билан келишув муваффақиятсизликка учраса, Лерой «Арсенал» ёки «Юнайтед»га ўтиш ҳақида жиддий ўйлайди.
Футболчининг амалдаги шартномаси мавсум охирида якунига етади. Бундеслиганинг жорий мавсумида немис футболчиси 5 та ўйин ўтказиб, 1 та гол уришга эришди.