Лондоннинг “Арсенал” клуби “Интер” дарвозасини ишғол эта олмади. Италия жамоаси биринчи бўлим охирида Хоқон Чалханоглунинг голи эвазига минимал ғалабага эришди.

Opta хабарига кўра, "Арсенал" 2006 йилнинг ноябрь ойидан бери биринчи марта Чемпионлар лигаси ўйинида дарвозага 20 та зарба йўллаб гол ура олмади. Бундан 18 йил аввал “канонирлар" ЦСКА билан уй учрашувида ҳам худди шундай ҳолат содир бўлганди: ўшанда лондонликлар 23 марта зарба беришган, бироқ уринишларнинг бирортаси ҳам мақсадга етмаган (0:0).

Умумий босқичнинг навбатдаги турида Микель Артета шогирдлари Лиссабонда маҳаллий “Спортинг”га қарши баҳс олиб боради. Учрашув 26 ноябрь куни бўлиб ўтади.