"Ювентус" ярим ҳимоячиси Артур Мело мавсум давомида клубни тарк этиши мумкин.

Бразилиялик футболчи жорий мавсумда бирор марта ҳам "бьянконерилар" қайдномасига киритилмаган ва бош мураббий Тьяго Моттанинг хавбек учун режаси йўқ. Инсайдер Николо Скиранинг сўзларига кўра, номаълум Бразилия клублари аллақачон Артур ҳақида маълумот сўраган, аммо 28 ёшли футболчи ватанига қайтишга шошилмаяпти - у фаолиятини Европада давом эттиришни хоҳлайди.

Айни пайтда "Ювентус" ва футболчи агенти биргаликдаги саъй-ҳаракатлар билан барча томонлар учун мақбул ечим изламоқда. Агар ҳаммаси режага мувофиқ бўлса, Артур январь трансфер ойнасига "кекса сеньора" сафини тарк этади.