“Шўртан” ва “Насаф” ўртасидаги Ўзбекистон Кубогининг 1/8 финал жавоб баҳси якунига етганидан сўнг ҳар иккала жамоа мураббийлари ўз фикрларини билдиришди.

Рўзиқул Бердиев (“Насаф” бош мураббийи):
— “Шўртан”да бош мураббий ўзгарганидан сўнг ўйинида ҳам ўзгариш юзага келгани кўринди. Жамоа таркибида ҳаракат қилган ёшлар ўзларидан яхши таассурот қолдиришди. Ўзим ҳам ўйиндан олдин “Шўртан” аралаш таркибда тўп сурса керак деган хаёлда эдим, чунки Зоир Тўрақулов кўпроқ ёшларга ишонч билдиришни маъқул кўради. Гарчи ғалаба қозонган бўлсак-да, бугун бизга осон бўлмади.

— Сизнингча, “Шўртан” намойиш этган футбол Эдгар Гесс пайтидаги футболдан фарқ қилдими?
— Битта ўйинни кўриб хулоса чиқариш қийин. Агар Зоир ака ўз қарашларини жамоа ўйинига кирита олса, менимча, “Шўртан” юқорига кўтарила олади. Лекин ўз вақтида Эдгар Гесс ҳам Ғузорда яхши жамоани шакллантирганди.