Испания терма жамоаси бош мураббийи Луис де ла Фуэнте «Барселона» ярим ҳимоячиси Марк Касадо ҳақида фикр билдирди.

21 ёшли футболчи «қизил фурия» сафида жума куни бўлиб ўтган Дания билан баҳсда дебют қилди. Баҳс испанияликларнинг 2:1 ҳисобидаги ғалабаси билан якунланди. «Кўк-анорранглилар» вакили иккинчи бўлимда захирадан майдонга тушди.

«Касадо барчамизни ҳайратда қолдирди», - дейди де ла Фуэнте. - У ёш, лекин анча етук ўйинчи. Бу унинг ўйин сифатларидан ташқари кучли томонларидан биридир. Айнан шунинг учун у ҳамма нарсани жуда яхши уддаламоқда», - деди Испания терма жамоаси бош мураббийи душанба куни Швейцарияга қарши ўйин олдидан.