Ушбу дам олиш кунлари Ўзбекистон кубогининг нимчорак финал жавоб учрашувлари ўтказилади. Мусобақада ғолибона юришини давом эттираётган темирйўлчилар бу босқичда «Қўқон-1912»ни имтиҳондан ўтказишади. Мазкур жамоалар ўртасидаги Қўқонда бўлиб ўтган дастлабки учрашувда «Локомотив» 2-1 ҳисобида ғалабага эришган ва қайсидир маънода чорак финал масаласини ижобий ҳал қилиб қўйган. Бироқ футболда шундай ибора бор: майдон текис, тўп юмалоқ. Шундай экан, хотиржамликка берилишга ҳали эрта.

Бу йил Ўзбекистон кубоги баҳслари ҳисоб бўйича 21-бор ўтказилмоқда. «Локомотив» эса унда ўн биринчи мавсум иштирок этяпти. Бунга сабаб, клуб 2002 йили рўйхатдан ўтказилган ҳамда мамлакат миқёсидаги мусобақаларда қатнашиш имкониятига эга бўлган. 2007-09 йиллар мобайнида жамоа биринчи юосқичдаёқ курашдан чиқиб кетган, яъни 1/16 финалдан нарига ўтолмаганди. Фақат, 2010 йилга келиб бу нохуш анъанага чек қўйилди ва ўша йили жамоамиз ярим финалгача етиб борди. Таъкидлаш керак, бу «Локомотив»нинг мамлакат кубоги мусобақаларидаги энг яхши натижаси саналади. Ўтган йили эса «Локо» ярим финал остонасида курашни тўхтатишга мажбур бўлганди.

Жорий йилги мусобақанинг дастлабки босқичида темирйўлчилар 1-лига етакчиларидан бири «Андижон»ни 1-0 ҳисобида доғда қолдириб, кучли 16 жамоа сафидан жой олди.