"Ювентус" дарвозабони Маттиа Перин "Лечче" билан ўйин ўтказилмай қолиши эҳтимоли бўлганини айтди.
"Фиорентина" футболчиси Эдоардо Бове аввалроқ бошланган "Интер" билан ўйинда ҳушини йўқотди. Учрашувнинг 17-дақиқасидаёқ ҳушидан кетган футболчи касалхонага ётқизилган. "Лечче" – "Ювентус" ўйини бошланишига бироз вақт қолганида, Бове ўзига келгани ва ташқаридан ёрдамсиз нафас олаётгани маълум бўлди.
"Ўйин бошланишидан олдин барчамиз йиғилиб, Флоренциядан Бове ҳақида хушхабар келмагунча, бугун кечқурун ўйнамасликка қарор қилдик. Биз майдонга тушишимиздан олдин унинг ҳеч қандай хавф остида эмаслигига ишонч ҳосил қилишни хоҳладик. Энди биз унинг тезроқ тузалиб кетишини тилаймиз ва уни майдонда кўришни интиқлик билан кутамиз", - дея Периннинг сўзларидан иқтибос келтиради Football Italia.
"Лечче" – "Ювентус" учрашуви 1:1 ҳисобида якунланди.
