Англиянинг "Арсенал" клуби ижрочи директори Иван Газидис жамоанинг мавсум финишидаги ўйинларига юқори баҳо бериш билан бир қаторда, рахбарият жамоадан анча узоқ вақтдан буён совринлар кутаётганини таъкидлади.

"Мавсум якунида Арсен Венгер ниҳоят кучли ва барқарор жамоа шакллантира олди ва бу келаси мавсум кетма-кет 16-мавсум Чемпионлар лигасида иштирок этишимизни таъминлади. Бу факт клуб учун ўта муҳим. Фақат, шуни ҳам қайд этиш керакки, Чемпионлар лигасида фақатгина иштирок этиш клубнинг максимум натижаси эмас. "Арсенал"нинг жиддий совринларни қўлга киритишини ҳамма, жумладан клуб соҳиби жаноб Кронке ҳам жуда-жуда хоҳлайди", дея Газидиснинг сўзларидан иқтибос келтирмоқда The Guardian нашри.

Эслатиб ўтамиз, "Арсенал" якунланган мавсумда Премьер лиганинг сўнгги 8 ўйинида 7 марта ғалаба қозонди ва бир ўйинда "МЮ" билан дуранг қайд этди.