"Манчестер Сити" бош мураббийи Пеп Гвардиола ярим ҳимоячи Кевин Де Брюйне билан можаро бўлганлиги ҳақидаги миш-мишларни рад этди.

"Манчестер Сити" ҳозирда Гвардиола даврида ўзининг энг оғир инқирозини бошдан кечирмоқда, у барча мусобақаларда кетма-кет еттита ўйинда ғалаба қозона олмади.

Шу билан бирга, Де Брюйне фақат сўнгги бешта ўйинда захирадан майдонга тушди, шу сабабдан Кевин Гвардиола билан тортишиб қолган деган тахминлар бор эди, бироқ Хосеп буни рад этади.

"Одамлар менинг Кевин билан муаммом бор, дейишади. Кевин ўйнамаса, менга ёқади деб ўйлайсизми? Йўқ.

Бу йигит рақиб дарвозаси олдидаги энг иқтидорга эга ва мен ундан фойдаланмоқчи эмасман? Тўққиз йил бирга бўлганимдан кейин менинг шахсий муаммоларим борми?

У менга клубдаги энг катта муваффақиятни келтирди, аммо у ўтган мавсумда беш ой ва жорий мавсумда икки ой жароҳат олди.

У 33 ёшда. Унга ўтган мавсумдаги каби босқичма-босқич ўзининг энг яхши формасига кириши учун вақт керак. У бунга интилмоқда ва унинг ҳолати яхшиланмоқда. Мен унинг энг яхши формада бўлишини жуда хоҳлайман", - деди Гвардиола Sky Sports билан суҳбатда.