Ўзбекистон XXII миллий чемпионати тўққизинчи тур учрашувларини «Қизилқум» — «Пахтакор» жамоалари баҳси якунлаб беради.

Агар чемпионатларимиз тарихига назар ташласак, бу жуфтлик ҳозиргача 26 маротаба ўзаро рўбарў келган. Уларда яққол устунлик пахтакорчилар томонида эканлигига шоҳид бўламиз. Зарафшонликлар бугунгача ўтказилган учрашувларнинг атиги биттасида ғалаба қозонган, холос. Унда 2:1 ҳисоби қайд этилган. Тўртта ўйинда эса кучлар тенг келган. Қолган барча йигирма бир учрашувда зарафшонликлар майдондан бош эгиб чиқиб кетишган. Ўзаро учрашувларда кончилар атиги етти очко тортиб олишган, холос. Меҳмонлар эса 67 очкони ўзлариники қилганлар.

Жами ўтказилган 26 учрашувда дарвозаларни ишғол этиш борасида ҳам сезиларли устунлик тошкентликлар томонида — 16:76 (!).

Ўтган йили асосан пахтакорчилардан олинган ижарачилар асосида мавсумни ўтказган кончилар ҳар икки ўйинда ҳам бир хил йирик ҳисобда мағлубиятга учрашган эди — 0:4. Чунки «Қизилқум» вакиллари «Пахтакор»га қарши ўйинда ижарачилар хизматидан фойдаланиш ҳуқуқига эга бўлишмаган.
 
Бу йилги мавсумни ниҳоятда бўш бошлаган зарафшонликлар аста-секин ўз ўйинларини топиб боришмоқда. Бош мураббий Рустам Забиров раҳбарлигида «Нефтчи» жамоаси устидан илк ғалабасини нишонлашга муваффақ бўлганлиги эътиборлидир.
 
Тўғри, навбатдаги ўйинда зарафшонликлар «Пахтакор»дан ижарага олинган дарвозабон Элдор Тожибоев, ҳимоячи Азамат Абдуллаев, ярим ҳимоячи Фарруҳ Шотурсуновлар хизматидан фойдалана олмайди. Аммо бу мезбонлар кайфиятига салбий таъсир қилмаслигига ишонамиз. Чунки ҳар бир жамоанинг ўзига яраша устунлик томонлари бўлганидек, ожиз жиҳатларини ҳам топиш мушкул эмас.
 
Муҳими, айни пайтда «Қизилқум»да ўзгача шижоат ва ғалабага иштиёқ ҳукмрон. Ҳар бир очко сув билан ҳаводек зарур бўлган маҳалда кончиларнинг бу гал рақибларига осонликча таслим бўлишларига ҳақлари йўқ.
 
«Қизилқум» — «Пахтакор» жамоалари учрашуви 27 май куни соат 17.00 да Зарафшондаги «Прогресс» стадионида бошланади.