Яқинда футзал бўйича Ўзбекистон чемпионатининг Олий лига 4-тур учрашувлари бўлиб ўтди. Уч кун давом этган қизғин баҳсларга Жиззахнинг “Жиззах ФММ” спорт мажмуаси мезбонлик қилди. Лигадаги 12 жамоа ушбу тур давомида иккитадан ўйин ўтказишди.
Кутилганидек, амалдаги чемпион ҳамда мамлакат кубоги соҳиби “БМБ”, шунингдек, турнир жадвали етакчиларидан – “Оил Стар” ва “Локомотив” жамоалари ўз рақибларидан бир бош баланд эканликларини исботлашди. Нодир Элибоев қўл остидаги “БМБ” даставвал “Сурхон”ни кўрдим демай ўтган бўлса (12:1), кейинчалик Самарқанднинг “Динамо”си 7:0 ҳисобида таслим этилди. Жорий турнир жадвалида терма жамоамиз ўзагини ташкил этувчи пойтахт жамоаси якунига етган 8 учрашув сарҳисобига кўра, максимал 24 очкога эга ҳамда энг яқин таъқибчиси “Оил Стар”дан 3 очко олдинда. Клуб аъзоси Музаффар Ахаджонов 17 та гол билан тўпурарлар рейтингини бошқариб келмоқда.
Эслатиб ўтамиз, Олий лига баҳслари жорий мавсум бир давралик тизимда ўтказилмоқда. Келгуси йил аввалида сўнгги тур учрашувлари бўлиб ўтади ҳамда мавсумга якун ясалади. Янги мавсум учун Олий лига формати янгиланган тартибда йўлга қўйилади.
