Yaqinda futzal bo‘yicha O‘zbekiston chempionatining Oliy liga 4-tur uchrashuvlari bo‘lib o‘tdi. Uch kun davom etgan qizg‘in bahslarga Jizzaxning “Jizzax FMM” sport majmuasi mezbonlik qildi. Ligadagi 12 jamoa ushbu tur davomida ikkitadan o‘yin o‘tkazishdi.

Kutilganidek, amaldagi chempion hamda mamlakat kubogi sohibi “BMB”, shuningdek,  turnir jadvali yetakchilaridan – “Oil Star” va “Lokomotiv” jamoalari o‘z raqiblaridan bir bosh baland ekanliklarini isbotlashdi. Nodir Eliboyev qo‘l ostidagi “BMB” dastavval “Surxon”ni ko‘rdim demay o‘tgan bo‘lsa (12:1), keyinchalik Samarqandning “Dinamo”si 7:0 hisobida taslim etildi. Joriy turnir jadvalida terma jamoamiz o‘zagini tashkil etuvchi poytaxt jamoasi yakuniga yetgan 8 uchrashuv sarhisobiga ko‘ra, maksimal 24 ochkoga ega hamda eng yaqin ta’qibchisi “Oil Star”dan 3 ochko oldinda. Klub a’zosi Muzaffar Axadjonov 17 ta gol bilan to‘purarlar reytingini boshqarib kelmoqda.

Eslatib o‘tamiz, Oliy liga bahslari joriy mavsum bir davralik tizimda o‘tkazilmoqda. Kelgusi yil avvalida so‘nggi tur uchrashuvlari bo‘lib o‘tadi hamda mavsumga yakun yasaladi. Yangi mavsum uchun Oliy liga formati yangilangan tartibda yo‘lga qo‘yiladi.