Лондоннинг "Арсенал" клуби кейинги бир неча ҳафта давомида Букайо Сакасиз ўйинларни ўтказади. "The Times" хабарига кўра, англиялик футболчи тиззасидан олган жароҳати туфайли 4-6 ҳафтага "канонирлар" сафида ўйнай олмайди. Букайонинг жароҳати борасида "Арсенал"дан расмий хабар йўқ.

Эслатиб ўтамиз, Сака бугунги "Арсенал"нинг юлдуз футболчиларидан бири, шунингдек, бутун Премьер-лигадаги энг қиммат футболчилардан бири ҳисобланади. Жорий мавсумда у барча мусобақаларда 24 та ўйинда 9 та гол урди ва 13 та голли узатмани амалга оширди.

Сака "Кристал Пэлас" - "Арсенал" учрашувининг биринчи бўлимида жароҳат олганди. Учрашув ўтган шанба куни бўлиб ўтган ва "Арсенал"нинг ғалабаси билан якунланганди - 5:1.